Suai 14-15 Agusto 2019
Nu’udar Rede ne’ebe serbisu ba asuntu rai no hela fatin, Rede ba rai (RbR) kontinua ezerse nia papel liu liu husi departamentu Edukasaun Legal no Mobilizasaun Masa desemina lei ba rai ba komunidade sira iha Postu administrativu Suai vila, Suco Debos no Suco Taz-hilin no iha tempo ne’ebe hanesan fahe hikas rezultadu peskiza kona ba Sistema Rejistrasaun Rai iha Timor Leste: Analiza impaktu Sistema Nacional Cadastru (SNC) ne’ebe mak halao iha tinan 2018 iha Suco rua ne’e (Debos no Taz-hilin).
Koordenador Nacional Rede ba Rai Hortencio Pedro Vieira iha nia intervensaun hateten katak objetivu principal husi sorumutu ohin loron nia ne’e mak oinsa desemina informasaun ba komunidade sira atu bele hatene no komprende sira nia direitu liga ho assunto rai nian “Rede ba Rai iha Tinan ida ne’e iha planu atu mai halo sosializasaun ba lei kona ba rai nian no mos atu relata relatoriu peskiza ne’ebe mak rede ba rai halao iha tinan kotuk kona ba sistema rejistrasaun rai iha Timor-Leste: Analiza impaktu Sistema Nacional Cadastru, durante halao peskiza ne’e ami hare’e katak komunidade barak mak sei preokupa kona ba asunto rai iha Timor, no ami hanoin katak Populasaun iha direitu ba asesu no hatene informasaun, oinsa sira bele hatene Lei no Sira nia Direitu ba rai nian tamba problema rai dalaruma mosu no ita labele hetan solusaun ne’ebe mak diak tamba ita nia Lei komplementar sira mos seidauk kompletu hotu hodi bele tulun implementasaun husi Lei ba Rai”, Tenik nia.
Iha fatin hanesan Representante Administrador Munisipiu Covalima Miguel Armada Cardoso apresia ho vontade husi Ekipa Rbr ne’ebe hakarak fahe rezultadu peskiza no Sosializa lei ba rai iha Munisipiu Covalima liu liu Suco Debos no Taz-Hilin “Atividade ohin loron ne’e kapas tebes ba ami nia komunidade, autoridade local, no lider komunitaria sira tamba ami bele hetan informasaun barak ne’ebe iha relasaun ho asuntu rai nian no komunidade sira aproveita direita bele iha diskusaun hamutuk ho rede ba rai kona ba problema rai ne’ebe mak sira infrenta”, nia haktuir.
Durante aprezentasaun Rezultadu Peskiza no Sosializasaun Lei ba rai, komunidade sira partipa ativu iha iha diskusaun no komunidade husi Suco Suai-Loro Jacinto Bere hato’o nia prekupasaun kona ba servisu ne’ebe halao husi parte Diresaun Nacional Terras Propriedade ne’ebe mak dala barak la fo informasaun klaru ba komunidade sira no rekomenda ba RbR halao mos atividade hanesan iha suku sira seluk atu nun’e komunidade bele asesu informasaun sira liga ho assunto rai, “Ami komunidade iha duvidas barak liu-liu kona ba serbisu husi Diresaun Nacional Terras Propriedades (DNTP) iha levantamentu cadastrais nian, iha fallansu no problema barak ne’ebe mak ami komunidade infrenta iha nia suco ami sente la kontente tamba dala barak informasaun ne’ebe mak sira fo la klaru mai ami, no durante ne’e sistema ne’ebe sira implementa ne’e la bazei ba lei ne’ebe mak ohin ekipa legal husi Rede ba rai hato’o ona iha Aprezentasaun ohin no ami foin komprende afinal lalaok sistema rejista rai ne’e hanesan ne’e”.
Atividade ida ne’e organiza Husi Rede ba Rai no nia membru sira (Rede Covalima no Jurista Advokasia) no partispa maximu husi segundu komandante munisipiu Covalima, Administrador Postu, Autoridade Local Suco, Aldeia no Lider komuniataria sira ho total partisipantes hamutuk 80 Resin.
Reportagem: Rbr Media Officer