Dili 22-23 Agusto 2019

Rede ba Rai partisipa treinamentu salvaguarda labarik ne’ebe fasilita husi ONG Forum Tau Matan. Treinamentu ida ne’e realiza iha loron kinta to’o sexta iha salaun Core Group Transparancy Bairo Pite Surikmas no partisipa husi Kdalak Sulimutu Institutu, Core Group Transparancy no Rede ba Rai

Fasilitador Eduarda Martins Gonsalves hateten, nu’udar ONG ne’ebe hare ba asuntu protesaun labarik, halo identifikasaun ba organizasaun no Rede sira ne’ebe halo serbisu parseria ho Oxfam atu bele tau importansia ba salva guarda labarik iha serbisu kada organizasaun nian “Ida ne’e hanesan rekeitus husi Oxfam nian atu garantia katak parseiru tomak ne’ebe halo parseria ho Oxfam tenke asegura katak salvasaun ka salva guarda labarik ne’e iha duni iha sira nia atividade no programa”, nia haktuir

Treinamentu ne’ebe halao durante loron rua ne’e desemina materia importante sira relasiona ho Salva Guarda Labarik , hahu’u husi kunhese saida mak direitu ba labarik sira, baze legal ne’ebe Timor Leste rasik iha ba Proteze labarik nia direitu, no mos oinsa kada organizasaun parseria sira iha sira nia politika interna rasik atu bele garantia salva guarda labarik.

Hortencio Pedro Vieira nu’udar Koordenador Rede ba Rai konsidera treinamentu ida ne’e importante no iha relasaun serbisu ho Rede nian ne’ebe liga ho asuntu rai, tamba dala barak wainhira hasoru kazu eviksaun sira mosu iha kampo dala barak involve labarik iha ne’eba entaun husi treinamentu ida ne’e  bele hatene ona katak aliende halao serbisu ba asuntu rai no hela fatin maibe iha tempo hanesan oinsa ita bele proteze labarik sira nia direitu kuando mosu problema ruma “bainhira iha kazu eviksaun ruma labarik sira sei hetan impaktu direita no mos rede nu’udar organizasaun sosiedade sivil presija tebes hodi lao turi prinsipiu direitu labarik nian”, tenik nia