S.E Sekretariu Estadu komunikasaun Social Sr. Mericio Juvinal “Akara” apresia ho serbisu husi Rede ba Rai nian ne’ebe halo monitorizasaun no advokasia ba assuntu rai no Hela fatin iha Timor Leste, “hau apresia tebes ho serbisu Rede ba Rai nian, hau mos akompanha foin dadauk lansamentu Relatoriu peskiza ne’e no nu’udar membru governu hau sei esforsu husi hau nia parte atu bele halo aprosimasaun ba sosiedade sivil no Ministeiru Relevante sira hanesan Ministeriu Justica no Sekretariu Estadu Terras Propriedades atu bele intende malu no ba oin se iha posibilidade sei kolabora hamutuk ho Rede karik iha serbisu ne’ebe relevante ba assuntu rai nain,” hateten Sekretariu Estadu iha Sorumutu ho Ekipa Rede ba Rai iha nia knar fatin.
Encontro ho Sekretariu Estadu ne’e nu’udar parte husi serbisu Rede ba Rai nian ne’ebe halo advokasia ba assuntu rai no Hela fatin no iha encontro ne’e Ekipa Rede informa ba Seketariu Estadu kona ba deskobrementu importante sira hanesan sistema rejistrasaun rai ne’ebe kontra Lei inan ba rai, Prosesu rejistrasaun rai la konsidera ema ho difisiensia sira, fo ameasa ba rai lisan, la promove transparansia, Ameasa Feto nia direitu no deskobrementu hirak ne’e Rede ba Rai hetan liu husi Peskiza ne’ebe halao ona kona ba Sistema Rejistrasaun Rai iha Timor Leste: Analiza Impaktu Sistema Nacional de Cadastro
Iha fatin la hanesan Koordenador Nacional Rede ba Rai Hortencio Pedro Vieira hateten katak Encontro ho SEKOMS Sr. Mericio Juvinal “Akara” ne’e nu’udar parte ida husi Serbisu Rede nian atu fahe Relatoriu Peskiza ne’e ba membru governu sira tamba konsidera SEKOMS iha papel importante ne’ebe bele komunika diak ho membru Governu sira seluk, “Hato’o mos ita nia relatoriu peskiza komunikasaun social mak bele halo komunikasaun ho membru governu sira seluk liga ho ita nia relatoriu bele aprosima membru governu seluk hanesan SETP atu levanta ita nia deskobrementu atu bele deskute rekomendasaun sira iha ita nia relatoriu,” Tenik nia.
Encontro ida ne’e marka prezensa husi ekipa Rede ba Rai ne’ebe mak kompostu husi koordenador Nacional, Koordenador Legal, Peskizador, no marka prezensa mos husi Assessor legal no Assessor tekniku husi Sekretariu Estadu Komunkasaun Sosial.