Dili 21 de janeiro 2021
Komunidade afeitadu husi alargamentu Aeroportu Internasional Nicolau Lobatu hato’o sira nia prekupasaun iha konsultasaun publiku ne’ebe halao husi ekipa interministerial Kompostu husi Ministeriu Obras Publiku,ANATL (Autoridade Nasional Aviasaun Timor-Leste) no ADB (Asian Development Bank), Diresaun Nasional Terras e Propriedades.
Iha konsultasaun publiku ida ne’e Komunidade Costa Bio husu Aldeia Naroman sente la satisfas ho prosesu konsultasaun ida ne’e tamba Iha Konsultasaun publiku ida ne’e Maioria Komunidade preokupa kona ba sira nia direitu ba rai no mos aihoris inklui Rate sira ne’ebe dadauk ne’e seidauk Iha Serteza tamba autoridade Relevante hanesan DNTPSC no Ministeriu Agrikultura la Marka prezensa Konsultasaun ida ne’e
“Konsultasaun ohin ne’e tuir hau nia hanoin la klaru tamba la iha prezensa husi DNTP no Ministeriu Agrikultura entaun encontro ida ne’e la klaru Konsultasaun ida ne’e halao ba dala 3 ona maibe ami seidauk iha esklaresementu ne’ebe klaru kona ba planu realojamentu kuando estadu atu hasai ami atu ba tau ami iha ne’ebe no oinsa ami nia direitu kona ba rai, no ohin lolos ami hakarak atu hatenek kona ba ida ne’e maibe infelizmente labele tamba Diresaun Nasional Terras e Propriedades labele marka prezensa iha ne’e”,Tenik nia.
Kona ba prekupasaun ida ne’e Jose dos Reis Abel Prezidente Grupo de Traballu Dezemvolvementu Aeroportu informa katak Reuniaun ne’e nu’udar prosesu ida no ne’e laos encontro ne’ebe definitivu fo solusaun ba defenitiva kestaun hotu-hotu no ba oin sei iha encontro no bao in sei reuniaun no sira seluk atu bele fo solusaun ba kestaun ne’ebe levanta no hatu’ur ona planu governu nian ne’ebe atu resolve aeroportu
“Tamba kestaun serbisu kolega balun husi Diresaun Nasional Terras Propriedades seidauk bele marka prezensa iha atu bele hatan ba kestaun sira ne’ebe levanta iha reuniaun ohin no ba oin espera sira marka prezensa atu bele hatan ba kestaun sira ne’e”
iha sikun seluk Koordenador Legal Rede ba Rai Julio da Silva rekomenda katak estadu tenke kumpri prosedimentu sira ne’ebe hakerek ona iha Lei Espropriasaun ba utilidade publika no prinsipiu lei Espropriasaun ba Utilidade Públika katak depois de hasai komunidade husi fatin ida ba fatin seluk tenke iha mudansa ba moris ne’ebé diak liu tan kompara ho antes hasai
“ne’e signifika governu tenke prepara kondisaun ne’ebé dignu ba komunidade sira emtermus de hela fatin, asesu ba nesesidade baziku sira hanesan be’e mos, Eletrisidade, asesu ba sentru saude, Escola ba Oan sira no seluk tan” Julio Haktuir
Rekomendasaun seluk mak estadu tenke iha planu realojamenentu ne’ebe klaru no tenke esplika ba komunidade afeitadu sira. Tenke fo indemnizasaun ne’ebe justu wainhira halo indemnizasaun ba komunidade afeitadu sira no antes indemnizasaun persija halo estudu ba folin sasan aktual nian iha merkadu. Rekomendasaun ikus no importante tebes ba estadu iha konsultasaun publiku ida ne’e tenke konsidera komunidade sira nia direitu ba rai ne’ebe hatur iha Lei Numeru 13/2017 Rejime Espesial ba Definisaun Titularidades ba Bein Imovel.
Bazeia ba Planu husi Governu Timor-Leste atu alarga Aeroportu Internasional Nicolau Lobato, dadauk ne’e ne’e prosesu levantamentu no Konsultasaun publiku husi Ekipa interministerial Kompostu husi Ministeriu Obras Publiku, ANATL (Autoridade Nasional Aviasaun Timor Leste) no ADB (Asian Development Bank), Diresaun Nasional Terras e Propriedades konsultasaun ba dala uluk dia 19 de Outubru 2020, segundu Suco Madohi 26 outubru 2020 no terseiru iha 21 de Janeiro 2021 ne’ebe partisipa husi komunidade afeitadu no Autoridade lokal. Tuir informasaun ne’ebe publika Alargamentu Aeroportu ida ne’e sei afeita ba Aldeia 5 (Naroman, Anin Fuik, Beto Tasi, Tera Santa, Loromatan) ho Total uma kain 200.