Viqueque 13-15 de Dezembru 2019
Rede ba Rai liu husi Departamentu Mobilizasaun no Edukasaun Legal halo sosializasaun Lei ba Rai no treinamentu kona ba Mediasaun no Igualidade Jeneru ba komunidade husi Munisipiu Viqueque Suco Uma-Quic, Carau-Balu, Uma Uain Leten, Maluro, Uma tolu, Luca.
Tuir koordenador Lei no Politika Rede ba Rai Advogadu Julio da Silva haktuir atividade ida ne’e sei halo iha viqueue Beasu no Same Betano atu bele tambafatin rua ne’e sai tarjetu ba projeitu bo’ot tasi mane ne’ebe sei implementa iha Timor “Rede ba Rai define area hanesan Betano no Beasu? Tamba iha Betano sei implementa Projeitu Bo’ot hanesan Refinaria (Prosesamentu Mina Rai), no Iha Beasu sei implementa projeitu LNG (Prosesamentu Gas) ne’e komunidade Sei lakon Rai barak, Tamba ne’e liu husi aktividade koperasaun Rede Ba Rai hakarak hakbi’it komunidade liu husi prosesu kapasitasaun ba konhesimentu prosesu legal sira mak hanesan; Lei ka regime nain ba rai no lei Espropriasaun. Realidade sei iha komunidade barak koalia konaba Direitu ba Rai, maibe sei falta iha informasaun oinsa hatene Asesu no Direitu lolos sai Nain ba Rai. Rede ba Rai hakarak motiva komunidade iha konhesimentu liu husi Sosializasaun informasaun Publiku ba komunidade target ba projeitu sira Hodi hakbi’it iha involvimentu sir aba defende rai”, Julio haktuir iha salaun Centro Joventude Viqueque.
“Rede ba Rai hakarak estabelese Grupo defende rai iha fatin rua mak hanesan Betano no Beasu. Rede ba Rai sei aumenta nia rede hamutuk ho grupo defende rai iha Municipiu Rua hanesan Manufahi no Viqueque, hodi fo atensaun no halo advokasia ba asuntu Rai. Liu husi koperasaun refere atu habo’ot liu tan komunidade iha konhesimentu ba asuntu principal hanesan Direitu humanu, no asuntu specifiku mak Direitu ba Rai”, Tenik nia.
Florindo de Jesus Komunidade husi munisipiu vikeke suco carau-balu hateten Treinamentu ida ne’e importante tebes ba ami komunidade husi munisipiu vikeke tamba ami nia munisipiu sai nu’dar fatin tarjeitu ida mos ba projeitu bo’ot hanesan projeitu Tasi-Mane “Viqueuqe tuir planu sei sai tarjeitu mos ba projeitu bo’ot hanesan projeitu Tasi-Mane entaun sei iha impaktu bo’ot ba ami liu-liu ami nia rai entaun treinamentu ida ne’e ami bele hetan informasaun sira kona ba oinsa ami nia direitu ba rai no karik iha problema ruma ne’ebe akontese iha ligasaun ho rai karik ami mos bele hatene tuir tamba hetan mos treinamentu mediasaun no jeneru no ami espera iha treinamentu ida ne’e bele aprende buat balun husi treinador sira nune’e bele aplika iha ami nia munisipiu”, Florindo haktuir
Treinamentu ida ne’e halao durante loron 3 iha salaun joventude viqueque no partisipa maximu husi komunidade viqueque villa no Beasu, treinamentu ida ne’e hetan Suporta husi Asesoria Dos Direitus Umanus Nasaun Unidas Iha Timor-Leste.