23/09/2019 Manufahi, Betano
Rede ba Rai liu husi nia departamentu Edukasaun Legal no Mobilizasaun Masa desemina lei ba rai ba komunidade iha Suku Betano. Kordenador Nacional Rede ba Rai iha nia Intervensaun hateten katak assuntu rai ne’e importante ba komunidade sira atu hatene sira nia direitu tuir lei No 13/2017 tamba assuntu rai ne’e mos dala barak sai kauza ba problema ne’ebe sosiedade barak hasoru, “tamba ne’e ohin loron Rede marka prezensa iha ne’e nu’udar parte ida husi serbisu rede nian atu sosializa lei ba rai ba komunidade sira iha Betano”, dehan nia.
Iha sosializasaun lei ba rai ne’e komunidade sira hato’o sira nia prekupasaun kona ba atu hetan sira nia direitu ba rai no oinsa atu hetan rekunhesementu legal tuir Lei ba rai nebe’e mak iha, komunidade sira mos hato’o sira nia prekupasaun kona ba projeitu refinaria ne’ebe govenru planu atu hari’I no iha komunidade nain ba rai hamutuk uma kain 22 mak gevernu seidauk indeminiza. Representante komunidade afeitadu Zeca Pereira husi Suco Betano Aldeia Bemetan hateten katak husi rai ne’ebe mak governu identifika mais ou menus hektares 230 depois de prosesu reverifikasaun, balun indeminiza ona maibe nia rai ho total hektares 1 metru 50 governu seidauk indeminiza ho razaun la iha dokumentus ne’ebe forte, “projeitu refere iha 2020 agora governu iha ona planu atu hahu’u ona serbisu konstrusaun fiziku no momentu ne’eba tuir konkordansia ne’ebe iha katak ami sei hetan rekompensasaun husi governu ba ami nia rai ne’ebe afeitadu, to’o agora nia prosesu lao hela maibe ami seidauk rona nia kontinuasaun”.
Hatan ba ida ne’e Xefe Suco Betanu Felipe de Araujo rekunhese katak mais ou menus iha parsela 20 ital mak seidauk indeminiza no agora dadauk nia prosesu sei lao hela, “planu governu nian atu hari’I Refinaria iha Betano ne’e molok hau nia mandatu no prosesu lubuk mak lao ona hahu’u husi identifikasaun, reverifikasaun lao hotu ona, kontratu mos asina ona, no hein deit pagamentu. Maibe sei iha parsela 20 ital mak seidauk konsidera husi parte estadu tamba ne’e ita esforsu atu buka dalan atu bele responde ba komunidade afeitadu sira ne’ebe sei iha parsela mean, no ita nia karta mos ba to’o ona Sekretariu Estadu iha ona konfirmasaun husi Timor Gap no despaixu mos ba ona bele halo pagamentu, sira ne’ebe mak parsela 20 ital ne’e sei aloka ba orsamentu 2020”, teniSk Nia.
iha atividades ne’e partisipa husi lider komunitaria husi aldeia hitu komunidade hamutuk 45 husi Aldeia Bemetan, Lalica, Loro, Leo-Ai, Rai-fusa, Selihasan, Sesurai.